我中有你，你中有我。。。。？

對近月反洗腦大事件有感而發，在社交網站亂寫一通聊搏一笑。矮肥鈍特在此重新轉貼充撐場面。

今日，隔離屋個仔，中學畢業幾年都未去搵嘢做既準隱青審萎男又走嚟搵我傾心事：「渣哥，我依家積極考慮緊去生死註冊處改名。」

我：「！？」

萎男：「一日最衰都係o個個怒火大叔審見芬囉。都唔知佢搞乜既，搞唔好自己頭家離兩次婚做負心漢都算啦，呢幾年同親契爺夾份做生意又周街唱佢獨攬公司大權，自己有糧出無權渣，都唔諗吓自己最霉時係邊個扶佢一把重振佢雄風。條友個名依家臭到呀，街外人個個都話佢正反骨契弟養唔熟呀，人人喊打，我唔想再同佢有乜啦lung呀！唔X想再姓審呀我！」

我：「……………但芬哥好似唔係你老豆喎……..使唔使搞到改姓，要數典忘祖咁大鑊呀？」

萎男：「我唔理啦！總之依家有個姓審既契弟做埋呢D嘢，搞到我俾FD笑話呢個姓專出反骨契弟，我無晒飛士呀！老西都唔想再認自己姓審！」

我：「……咁你有無同你阿爸阿媽傾過呀？改名咁大件事……….」

萎男：「佢哋梗話唔好架，但我唔理啦！佢地唔同我一齊改咪各行各路囉！總之我就唔要姓審！改咗名後我同佢哋再無關係！我唔識佢地！」

我：「…….但呢度D街坊同親戚都知你確實係佢地個仔喎！一齊住咗十幾廿年………..」

萎男：「我自己知自己唔係咪得囉！你理得我啫！」

我：「…..咁以後如果D人改唔到口繼續叫你審萎男你會唔會應人呀重？」

萎男：「新年兩隻老嘢同街坊派利是咪敷衍吓囉！有數圍嘛！平時睬佢都有味啦！」

我：「咁你改咗名後會唔會搬走唔同佢地住呀…..？」

萎男：「………點解要先？由出世我就住喺度，真係要講呀，佢地結婚前都唔係住呢頭既，咁你話邊個先係庄邊個係閒先？走？無嘢化？」

至此，我無言。臨返入屋前問萎男諗好改咩名未，佢不假思索答我「王芝峰」。